Parecer sen imitar, figurar sen esquecer.

Escenario carnavalesco de vida, peso do parecer e implacable xuízo de aspectos.

Que muller eras ti?

Que muller es ti?

A aparencia como posibilidade de futuro.

​Agosto de 2020. Atopámonos no centro de Allariz, concretamente no cruzamento entre as rúas da Cruz e Fonteiriña. Ante nós, unha rechamante fotografía con data de 1925 e con autoría de Manuel Riesco. Nela, un grupo de mulleres, vestidas co conxunto de dous equipos de fútbol: o Arnoya de Allariz e o Celanova, con actitude desafiante e seria, e recollidos estilo belle époque, baixo o título “Equipo de fútbol feminino no vello campo de Vilanova”.

Aparentemente, estabamos ante o primeiro rexistro dun equipo pioneiro de futfem, unha imaxe en branco e negro, pertencente ao Arquivo Municipal de Allariz, onde estas 12 mulleres aparecen ataviadas co uniforme futbolístico pousando en formación.

A imaxe parécenos dunha inmensa beleza e cústanos deixar de pensar na historia que debe de haber por detrás:

Quen eran estas mulleres?

Que foi delas?

Que sucedeu nese partido?

Atopámonos ante unhas pioneiras?

Fronte a estes interrogantes, comezamos -sen retorno- unha inmersión nas curiosidades destas travesías de vida feminizadas e aínda por descubrir.